La conquête de Constantinople  Geoffroy de Villehardouin  1198 CE

Sachiez que .M. et .C. et quatre vinz [et .xvii.] anz aprés l'Incarnation Nostre Sengnor Jesu Crist, al tens Innocent, apostoille de Rome, et Phelippe, roy de France, et Ricchart, roy d'Engleterre, ot un saint home en France, qui ot nom Folques de Nuilli (cil Nuillis si est entre Ligni sor Marne et Paris). Et il ere prestres et tenoit la parroiche de la ville. Et cil Folques dont je vos di comença a parler de Dieu par France et par les autres terres entor. Et Nostre Sires fist maintes miracles por lui.

Sachiez que la renomee de cel saint home ala tant qu'ele vint a l'apostoille de Rome, Innocent. Et l'apostoille envoia en France, et manda al prodome que il preechast des croiz par s'autorité. Et aprés i envoia un suen chardonal, maistre Perron de Chappes, croisié, et manda par lui le pardon tel com je vos dirai: tuit cil qui se croisseroient et feroient le servise Deu un an en l'ost seroient quites de toz les pechiez que il avoient faiz, dont il seroit confés. Porce que cil pardons fu isi granz, si s'en esmurent mult li cuers des gens, et mult s'encroisierent porrce que li pardons ere si granz.